Urteko eranskina

Urtero, Hitzarmen-markoari lotzen zaion eranskin bat finkatzen du EEP-ren eta hizkuntza politikarako sailburuordetzaren arteko partaidetzaren animazioaz arduratzen den jarraipen batzordeak.

Dokumentu horrek zehazten ditu : alde batetik, fondo bateratuaren antolaketa  (bi aldeen ekarpenak, deialdiko araudiak...) eta, bestetik, bi instituzioetako zerbitzuek elkarrekin eramanen duten ekintza programa.

Ekintza amankomun baten adibidea : 2006ko Inkesta soziolinguistikoa

Inkesta bezalako tresnak ezinbestekoak dira egoera soziolinguistikoa zehazki ezagutzeko, daramaten politiken emaitzak ebaluatzeko eta gizartearen eragile guziekin azterketa hori partekatzeko.

Euskal Autonomi Erkidegoak 1991, 1996 eta 2001 urteetan antolatu hiru inkestek Iparraldearen egoera jadanik aztertzen zuten.

2006ko inkesta elkarrekin antolatzea urrats garrantzitsu bat da : Euskal Kultur Erakundearekin lehenago finkatu partaidetzari segida bat emanez, lehen aldiko, mugaz bi aldeetako botere publikoek ekintza amankomun bat elkarrekin gauzatu dute. EAEk lan honen obragintza bere gain hartu du, Euskal Herri osorako.

Iparraldeari dagokionez, EEPk, lagina finkatzeko ardura INSEE erakundeari eman dio eta, inkesta egiteko aukeratua izan den enpresarako (SIADECO), finkatu kargu txostena (galdetzaileak, inkestatuen hautaketa…) errespetatu ahal izateko lan-baldintzak segurtatuak zirela zaindu du.

Bestalde, EEPk ekarpen bat egin du, desmartxaren beste urrats batzuetan : txostenen idazketa eta itzulpenak, emaitzen zabalkuntza,…